बृहत् योग विज्ञान शिविरबाट दुई हजार बढी लाभान्वित

 कात्तिक १३ गतेदेखि १७ गतेसम्म सञ्चालन भएको शिविरको उद्घाटन जिल्ला समन्वय समिति, मकवानपुरका प्रमुख ललित घलानले गर्नुुभएको थियो भने समापन बागमती प्रदेशका मुख्यमन्त्री किरण थापा मगरले गर्नभएको थियो । 

 समापन कार्यक्रममा मुुख्यमन्त्री थापाले योग सरकारको प्राथमिकतामा रहेको बताउनुुभयो । पछिल्ला वर्षमा नसर्ने रोगबाट ग्रसित हुनेहरूको संख्या बढ्दो क्रममा रहेको बताउँदै उहाँले सुगर, थाइराइड, नसा लगायतका धेरै स्वास्थ्य समस्याहरूको न्युनीकरणमा योगको विशिष्ट महत्व रहेको बताउनुभयो ।

 शिविरमा पाँचै दिन सर्वसाधारणको उत्साहपूर्ण सहभागिता रहेको पतञ्जली योग जिल्ला समिति, मकवानपुरका अध्यक्ष रामकृष्ण थापाले बताउनुभयो । उहाँका अनुुसार आज समापनका दिनमा चितवनबाट समेत दुई सय जना शिविरमा सहभागी भएका थिए ।

 शिविरका अवसरमा योगाभ्यास, प्राणायाम तथा स्वस्थ जीवनशैलीसम्बन्धी विषयमा प्रशिक्षण दिइएको बताउँदै उहाँले पतञ्जली योग समिति नेपालका मुख्य केन्द्रीय प्रभारी लवदेव मिश्र मुख्य प्रशिक्षकका रुपमा रहनुभएको जानकारी दिनुभयो ।

 हेटौंडा ७ स्थित नवज्योति माध्यमिक विद्यालयको फुटबल मैदानमा प्रत्येक दिन बिहान ५.०० बजेदेखि ७.०० बजेसम्म योग शिविर सञ्चालन गरिएको आयोजकले जनाएको छ ।